TODAY, TOP 10 HOT NEWS

Development Projects

National Movements

Нийслэлийн Засаг дарга бөгөөд Улаанбаатар хотын Захирагч Б.Пүрэвдагва Налайх дүүрэгт ажиллах үеэр А0501 Улаанбаатар-Өндөрхаан чиглэлийн авто замын Налайх-Тэрэлжийн төлбөр авах цэгийг нүүлгэн шилжүүлэх асуудлыг хэлэлцлээ. Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Улаанбаатар хотын иргэд амьдарч байгаа хотынхоо газарт нутагт зорчихдоо авто замын хураамж 5,000 төгрөг төлж байна. Мөн энэ хэсэг аялал жуулчлалын бүс хэдий ч замын хураамж төлөх гэж түгжрэл ихээр үүсгэдэг. Тиймээс Налайх-Тэрэлжийн төлбөр авах цэгийг Цонжинболдог руу нүүлгэхийг Зам, тээврийн яамд уламжилж, шийднэ. Налайх дүүрэг хотын аялал жуулчлалын бүс. Барилгажилт ихсэхээс өмнө замын трассууд, амрах талбайгаа чөлөөлөх хэрэгтэй. Налайх, Багануур, Багахангай дүүргийг эдийн засгийн тусгай бүс болгож, аж үйлдвэрийн паркуудыг хөгжүүлэхэд зорилт тавин ажиллаж байгаа” гэлээ. Налайх дүүргийн Засаг дарга Д.Наянбаяр “НИТХ-аар Налайхын Цэргийн ангийн урдуур явж байгаа замыг дөрвөн эгнээ болгохоор шийдсэн. Горхи Тэрэлжийн байгалийн цогцолборт газарт жилд ойролцоогоор дотоод, гадаадын нэг сая жуулчин ирдэг гэсэн судалгаа байдаг. Тус замыг дөрвөн эгнээ болгож шинэчлэхэд Улаанбаатар хотоос Тэрэлж рүү зорчих жуулчдын тоо нэмэгдэж, иргэд ая тухтай зорчих нөхцөл бүрдэнэ” гэв.

Азийн наадмын эхний өдөр Монголын багийн анхны медалийг дугуйчин С.Жамбалжамц эх орондоо авчирлаа. Дугуйн төрөлд нийт 19 тамирчин хурд сорьсноос манай тамирчин С.Жамбалжамц 42:58.02 минутаар барианд орсноор хүрэл медаль хүртлээ. Энэ төрөлд Казахстаны дугуйчин Алексей Луценко алтан медаль хүртсэн бол Японы тамирчин Шинсүкэ Имамүра мөнгөн медаль зүүв. Ийнхүү Ази тивийн аваргын хошой мөнгө, гурван хүрэлтэй С.Жамбалжамц Азийн наадмын хоёр хүрэл медальтай болж байна. Өдгөө 30 настай дугуйчин эр дөрвөн жилийн өмнө Ханжоугийн Азийн наадамд мөн хүрэл медаль хүртэж байлаа. Казахстаны дугуйчин А.Луценко дөрвөн жилийн өмнө мөнгөн медаль хүртэж байсан бол энэ удаад амжилтаа ахиулан тивийн наадамдаа түрүүллээ.

Японд өчигдөр нээлтээ хийсэн Азийн наадмын анхны медальтнууд өнөөдөр тодорлоо. Тодруулбал триатлоны эрэгтэйчүүдийн ангилалд Японы Такүми Хожо анхны алтан медалийн эзэн болсон юм. Гурван жилийн өмнө холимог хос төрөлд алтан медаль хүртэж байсан 30 настай эр энэ удаад ганцаарчилсан төрөлд аваргалсан байна. Тэрбээр 52:56 минутад замаа дуусгаснаар Японы багийн анхны алтан медалийг хүртсэн бол БНХАУ-ын Ши Рү Жан мөнгө, Казахстаны Ариан Жанабай хүрэл медаль хүртсэн юм. Гэрэл зургийг М.Мөнхзул Гэрэл зургийг М.Мөнхзул Гэрэл зургийг М.Мөнхзул Энэ төрөлд спортын мастер Ганбаатарын Амарсанаа өрсөлдсөн юм. Харамсалтай нь манай тамирчин барианд орж чадсангүй. Триатлоны эмэгтэйчүүдийн ангилалд Цогийн Аяс, Ганбаатарын Номуунаа нар өрсөлдөх хуваарьтай.

Азийн зуны спортын XX наадам өнөөдөр албан ёсоор хөшгөө нээв. Японы телевизийн болон кино найруулагч Юкихико Цүцимигийн "Зүрхний аялгуут хэмнэл" зохиолын дагуу Азийн Үндэсний Олимпын Хороо (ҮОХ)-д бүртгэлтэй 45 байгууллага, тэр дундаа анх удаа дүрвэгчдийн багийг оруулсан тамирчдын жагсаал боллоо. Азийн наадмыг гурав дахь удаагаа зохион байгуулж буй Япон Улсын төрийн дуулал эгшиглэсний дараа хоёр цаг гаруй үргэлжилсэн нээлтийн ёслолд Япон Улсын Цог Жавхлант Эзэн Хаан Нарүхито, Эрхэм дээд Хатан Масако, Олон Улсын Олимпын Хороо (ОУОХ)-ны ерөнхийлөгч Кристи Ковентри, Азийн Олимпын Зөвлөлийн тэргүүн Шейх Жоан бин Хамад тэргүүтэй албаныхан оролцсон юм. Манай улсаас Монголын Үндэсний Олимпын Хороо (МҮОХ)-ны Б.Баттүшиг, Монголын багийн ахлагчаар томилогдсон Улсын Их Хурал (УИХ)-ын гишүүн Х.Баттулга, Х.Булгантуяа нарын зочид төлөөлөв. Гэрэл зургийг Reuters агентлагийн онцгой зөвшөөрөлтэйгөөр ашиглав Азийн наадмын нээлт, хаалтын ёслол Нагоя хотын "Mizuho Park Athletic Stadium"-д болж буй. Тэртээ 1941 онд баригдсан энэ цэнгэлдэх 30,000 хүний суудалтай. Шар тивийн 45 улсын 11,000 орчим тамирчин 469 алтан медалийн төлөө өрсөлдөх юм. Нээлтийн ёслолд Японы хөвгүүдийн хамтлаг INI ая дуу өргөсөн юм. Үүний дараа Нагоя хотын бэлгэ тэмдэг Киншачи загасны дүрсийг дроноор үзүүлэв. Дэлхийд нэртэй хийлч Хикарү Хикасэгийн хөгжмийн аянд Нагоя хотыг бүрэн илэрхийлсэн үндэсний болон бусад хувцастай 240 бүжигчин тамирчдыг угтаж авав. Гэрэл зургийг Reuters агентлагийн онцгой зөвшөөрөлтэйгөөр ашиглав Азийн олимпын бамбарыг Японы спортын үе үеийн алдартнууд цэнгэлдэхэд буухиалав. Тодруулбал чөлөөт бөхийн олимпын аварга Акира Фүжинами буухиаг эхлүүлж, олимпын дөрвөн удаагийн аварга усанд сэлэгч Косүкэ Китажима, олимпын гурван алттай, гүйгч Кочи Ито, бадминтоны хосын төрөлд олимпод түрүүлсэн Аяка Такахаши нар буухиалсан юм. Улмаар 2004 оны Афины олимпод дүүгүүр шидэлтийн төрлөөр алтан медаль хүртсэн Кожи Мүрофүши, түүний эцэг 1970 оны Азийн наадамд мөн дүүгүүр шидэлтээр аваргалсан Шингэнобу Мүрофүши нар хамтдаа бамбарыг бадамлууллаа.

Азийн зуны спортын XX наадам өнөөдөр албан ёсоор хөшгөө нээлээ. "Imagine One Asia" уриан дор тивээрээ нэгдмэл байхыг уриалж буй спортын наадамд тус тивийн 45 улс спортын олон төрөлд энэ сарын 19-нөөс аравдугаар сарын 4-нийг дуустал өрсөлдөнө. Манай улсаас энэ удаагийн наадамд спортын 34 төрөлд 299 тамирчин өрсөлдөхөөр Японыг зорих юм. Тэдний түрүүч нь Нагоя хотноо ирсэн бөгөөд өнөөдрийн нээлтийн ёслолд нийт 100 гаруй тамирчин, албаны хүн оролцож байна. Энэ удаагийн Азийн наадамд зохион байгуулагч Япон Улсаас хамгийн олон буюу 927 тамирчин оролцож байгаа бол БНХАУ 811, БНСУ 787, Тайланд 690 тамирчин оролцуулахаар бүртгүүлжээ. Азийн наадмын нээлтийн ёслол "Palorma Mizuho Stadium"-д орон нутгийн цагаар 18:00 цагаас эхэлсэн. Нийт 30,000 хүний багтаамжтай тус наадмын нээлтийн ёслолд Япон Улсын Цог Жавхлант Эзэн Хаан Нарүхито, Эрхэм дээд Хатан Масако нар оролцлоо. Монголын багийн тугчаар дээд лигийн “Хасын Хүлэгүүд” багийн тоглогч, 3х3 сагсан бөмбөгийн шигшээ багийн тамирчин, ОУХМ Ч.Тэмүүлэн, волейболын үндэсний шигшээ багийн тамирчин, ОУХМ П.Энххүслэн нар сонгогдсон билээ. Нээлтийн үйл ажиллагаанд Олон улсын олимпын хорооны гишүүн, МҮОХ-ны ерөнхийлөгч Б.Баттүшиг ОУОХ болон Азийн олимпын зөвлөлийн хүндэт гишүүдтэй нэгдэн хуран цугласан олны хүндэтгэлийг хүлээн сууна. Албаны төлөөллөөс “Айчи-Нагоя-2026” ХХ Азийн наадмын Монголын багийн ахлагч, УИХ-ын гишүүн Х.Баттулга, дэд ахлагч, УИХ-ын гишүүн Х.Булгантуяа, Соёлын сайд Ж.Алдаржавхлан, МҮОХ-ны ерөнхий нарийн бичгийн дарга Э.Бадар-Ууган нар оролцов.

Сүүлийн өдрүүдэд метанолоор хордсон согтууруулах ундаа хэрэглэсний улмаас 48 хүн амиа алдаж, 182 хүн өвчилснийг Нигери улсын хүнс, эмийн хяналтын байгууллага Бямба гарагт мэдээлжээ. Энэхүү эмгэнэлт явдал тус улсын баруун өмнөд бүсийн Ондо мужийн гурван дүүрэгт гарсан бөгөөд хохирогчид орон нутагт нэрсэн “Сармагчны Сүүл” гэгддэг ундааг ууснаас болсон гэнэ. Метанол нь маш хортой бодис бөгөөд дотоод эрхтний үйл ажиллагааг зогсоож, үхэлд хүргэх, эсвэл хараагүй болгох аюултай байдаг. Нигери улсын хүнс, эмийн хяналт, зохицуулалтын үндэсний агентлаг NAFDAC-ийн мэдээлснээр энэхүү ундааны улмаас таван хүн бүрэн, хоёр хүн хэсэгчлэн хараагүй болжээ. Хордлогын эхний тохиолдол энэ сарын эхээр бүртгэгдэж, хохирогчдын тоо аажмаар нэмэгдэж байгаа гэнэ. Эрх баригчид ундааг үйлдвэрлэж, худалдсан хэргээр 15 хүнийг баривчлан шалгаж эхэлжээ. “Би Баасан гарагт хоёр хундага уучхаад гарсан. Харин Бямба гарагт хараагүй болсноо мэдсэн” гэж хохирогчдын нэг 32 настай Сола Адебайо эмнэлгийн орон дээрээс орон нутгийн телевизийн сувагт ярьсан байна. Африк тивийн хамгийн их хүн амтай (243 сая) улс болох Нигерийн хяналт сул хөдөө орон нутагт хүмүүс гар аргаар нэрсэн согтууруулах ундаа хэрэглэх явдал түгээмэл байдаг. Лабораторид хийсэн шинжилгээгээр сэжиг бүхий ундааны дээжээс үхэлд хүргэх аюултай спиртийн нэгдэл болох “метанолын өндөр агууламж” болон “индика” төрлийн каннабис илэрсэн тухай NAFDAC мэдээлжээ. Эх сурвалж: AFP

Нийслэлийн Засаг дарга бөгөөд Улаанбаатар хотын Захирагч Б.Пүрэвдагва дүүргийн эмнэлгүүдийн өвөлжилтийн бэлтгэл, томуу, томуу төст өвчний дэгдэлтийн үеийн бэлэн байдлыг хангаж, дархлаажуулалтыг нэмэгдүүлэх, эмнэлгээр үйлчлүүлэх хүмүүсийн сэтгэл ханамжийг дээшлүүлэх зэрэг асуудлаар Баянгол дүүргийн Эрүүл мэндийн төвд ажиллажээ. Баянгол дүүргийн Эрүүл мэндийн төвийн дарга Ц.Бямбасүрэн “Энэ оны зургаадугаар сарын байдлаар БГД-ийн Эрүүл мэндийн төвд хорт хавдрын 2,672 тохиолдол хянагдаж байна. Энэ нь өмнөх онуудаас 4-5 дахин ихэссэн. Хөнгөвчлөх эмчилгээний 10 ор хүрэлцдэггүй. Тиймээс засвар өргөтгөл хийж, 25 ор ажиллуулах шаардлага байна. Хөнгөвчлөх тасаг, мэс заслын өрөөний хүчин чадалтай уялдуулан хүчилтөрөгчийн үйлдвэр барих хэрэгцээ бий. Хүчилтөрөгчийн үйлдвэр барихад Эрүүл мэндийн төвийн хашаан доторх “ХТП – 3168” трансформаторын дэд станцыг нүүлгэн шилжүүлэх зэрэг шийдэл хайж байна. Баянгол дүүргийн хэмжээнд бөөрний архаг дутагдалтай 52 өвчтөн байдаг. 2016 онд диализын дөрвөн аппарат шинээр суурилагдсан. Үүнээс хойш огт шинэчлээгүй, ачааллаа дийлэхгүй байгаа” гэлээ. Баянгол дүүрэгт томуу, томуу төст өвчнөөс урьдчилан сэргийлэх дархлаажуулалт 54.2 хувьд хүрчээ. Энэ талаар нийслэлийн Эрүүл мэндийн газрын дарга Н.Наранбаатар “Томуугийн эсрэг дархлаажуулалтын үр дүнд эмнэлэгт өвчлөл 20 хувь, хэвтэн эмчлүүлэх 30 болон түүнээс дээш хувиар буурах боломжтойг Дэлхийн эрүүл мэндийн байгууллагаас судалсан байдаг. Нийслэлийн хэмжээнд дархлаажуулалт үр дүнтэй явагдаж байна. Өнөөдрийн байдлаар есөн дүүргийн 12 эрүүл мэндийн байгууллагад 772 хүүхдийн тусламжийн ор дэлгэсэн байна. Томуугийн дэгдэлтээс хамаараад 115 хувь буюу 1,607 ор хүртэл дэлгэхээр төлөвлөсөн” гэв. Баянгол дүүргийн Эрүүл мэндийн төвд ажиллах үеэр нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Эрүүл мэндийн төвд тулгамдаж буй эрчимт эмчилгээний тоног төхөөрөмж, хөнгөвчлөх тасгийг өргөтгөх, эмнэлгийн дэргэд баригдах хүчилтөрөгчийн үйлдвэр барих ажлыг цаг алдалгүй эхлүүлэхийг хамгийн боломжит хувилбараар шийднэ. Мөн диализын аппаратыг судал. Томуу, томуу төст өвчнөөс урьдчилан сэргийлэх хүрээнд нийслэлийн иргэддээ өөрт хамгийн ойр өрхийн эмнэлэг, эрүүл мэндийн төвд хандаж “Томуугийн эсрэг хамтдаа” дархлаажуулалтын аянд хамрагдахыг уриалж байна. Бид энэ өвөл эх, хүүхдийг коридорт эмчлүүлэхгүй байх нөхцөл боломжоор хангахаар төрөлжсөн эмнэлгүүдийг бий болгон ажиллаж байна. Эмнэлгүүдийн зогсоолын эхний хоёр цаг үнэгүй байгаа ч эмнэлгээр үйлчлүүлээгүй хүмүүс зогсоолд нь машинаа тавьдаг, зогсоол хүрэлцэхгүй хэвээр байна. Энэ асуудлыг судлах хэрэгтэй” хэмээн үүрэг чиглэл өглөө.

Киевийн эрх баригчдын удаа дараагийн хүсэлтийн хариуд АНУ-ын засаг захиргаа Украин улсад $2.7 тэрбумын өртөг бүхий агаарын довтолгооноос хамгаалах зэвсэг техник нийлүүлэхээр болжээ. Баасан гарагийн орой АНУ-ын төрийн департаментаас Конгресст илгээсэн мэдэгдэлд Украины засгийн газарт агаарын довтолгооноос хамгаалах системийг сайжруулах тоног хэрэгсэл болон холбогдох төхөөрөмж, үйлчилгээг нийлүүлэх шийдвэр гаргаснаа мэдэгдсэн байна. Энэхүү саналыг Конгресс хянан хэлэлцсэний дараа эцсийн шийдвэр гарах юм. “Хэрвээ энэхүү нийлүүлэлт хэрэгжвэл Украин улс Европын орнуудын хандив болон өмнөх засаг захиргааны үед батлагдсан АНУ-ын санхүүжилтийн хөтөлбөрийн хөрөнгийг хослуулан төлж барагдуулах болно. Нийт өртөг $2.68 тэрбум байхаар тооцоолж байна” гэж төрийн департамент мэдэгджээ. Киев хотыг чиглэсэн Оросын агаарын довтолгоо сүүлийн үед эрчимжиж байгаа бөгөөд баллистик пуужингийн халдлагыг эсэргүүцэх зэвсэг техникийн дутагдал Украины талд тулгараад байгаа. Бямба гарагт ОХУ-ын ерөнхийлөгч асан Дмитрий Медведев тус улсын эсрэг АНУ-ын авсан шинэ хориг арга хэмжээг “цэргийн хүчээр сөрөн зогсох” замаар эсэргүүцэх ёстойг мэдэгджээ. Баасан гарагт АНУ-ын Конгрессын зөвшөөрөл өгсөн шинэ хориг арга хэмжээний хуулийн төслийг ерөнхийлөгч Дональд Трамп баталсан юм. Сенатор агсан Линди Грэмийн нэрээр нэрлэгдсэн энэ хууль нь Оросын эрчим хүч, батлан хамгаалах салбар болон Путин, Кремлийн бусад өндөр албан тушаалтнуудыг онилж байгаа. “Далайн цаана байгаа ч тэд зөвхөн цэрэг зэвсгийн хүчээр сөрөн зогсох хэлийг ойлгодог бөгөөд үхсэн террорист Грэмийн нэрэмжит хууль мэт Оросын эсрэг харгис үйлдлүүдэд бид яг ийм хэлээр хариуг нь өгөх ёстой” гэж Оросын үндэсний аюулгүй байдлын зөвлөлийн дэд даргын албыг хашдаг Медведев өөрийн Телеграм сувагт бичжээ. Эх сурвалж: AFP

Бямба гарагт Йемений босогчдын Хусит зэвсэгт бүлэглэл Саудын Арабын нийслэл Эр-Рияд хотын “амин чухал” байгууламжууд руу пуужин болон нисгэгчгүй онгоцоор довтолсноо мэдэгджээ. Тус хотын гол нисэх буудлын ойролцоо гал гарч, их хэмжээний хар утаа олгойдож байгааг харуулсан зураг бичлэг тарснаас хойш хэдхэн цагийн дараа уг мэдэгдэл гарсан юм. Сүүлийн саруудад Ираны холбоотон Хусит бүлэглэл Саудын Арабын эсрэг довтолгоогоо эрчимжүүлсэн нь Ойрх Дорнодын бүс нутагт бас нэг мөргөлдөөний фронт нээгээд байгаа. Эр-Рияд хотын яг ямар байгууламжуудад халдсанаа Хуситууд тодорхой дурдаагүй ч Улаан тэнгисийн эргийн газрын тосны экспортын төв болон Янбу хот дахь төрийн өмчит “Aramco” компанийн байгууламжид халдсанаа мэдэгджээ. Тэд энэ халдлагаа Йемений нийслэл Санаа хот руу Саудын Арабын агаарын зэвсэгт хүчин довтолсны хариу арга хэмжээ гэж тайлбарласан байна. Саудын тал одоогоор Хуситууд халдлага үйлдсэнийг албан ёсоор батлаагүй байна. Бямба гарагт тус улсын эрх баригчид Эр-Рияд хот болон түүний зүүн талд оршдог Аль-Харж хотод агаарын довтолгоо болж болзошгүй талаар анхааруулгыг иргэдийнхээ гар утсанд илгээсэн юм. Долдугаар сард Хуситуудын халдлага эрчимжсэнээс хойш анх удаагаа ийм анхааруулга цацжээ. Хөрш Йемений хүн ам шигүү суурьшсан бүс нутаг болон хойд хэсгийн ихэнхийг хянадаг Хусит босогчид долдугаар сараас эхлэн Улаан тэнгист Саудын Арабын эсрэг бүслэлт зарлаж, ачаа тээврийн хөлөг онгоцнууд руу нь довтлох болсон юм. Ормузын хоолойг Иран улс хаасны улмаас газрын тосны экспортын замаа Улаан тэнгис рүү шилжүүлсэн Саудын Арабын хувьд энэ нь том цохилт болж, дэлхий дахины эрчим хүчний хямралыг улам гүнзгийрүүлж байгаа. Энэ сард Хуситууд маш хурдтай довтолсны үр дүнд Йемен улсын Улаан тэнгисийн эрэг дагуу нутаг дэвсгэрийг бүхэлд нь эзэлсэн юм. Ингэснээр Улаан тэнгисийн хоёр гарцын нэг болох Баб эль-Мандебын хоолой тэдний хяналтад шилжиж байна. НҮБ-ын аюулгүй байдлын зөвлөл Баасан гарагт гаргасан мэдэгдэлдээ “Хусит бүлэглэлийн Саудын Арабын хаант улсын эсрэг явуулж буй халдлага, тэр дундаа эмэгтэйчүүд, хүүхдүүд зэрэг энгийн иргэд болон эрчим хүчний дэд бүтцийг гэмтээсэн халдлагуудыг эрс хатуу буруушааж” байгааг анхааруулжээ. Эх сурвалж: Reuters

Бямба гарагт сошиал сүлжээнд нийтэлсэн мэдэгдэлдээ АНУ-ын ерөнхийлөгч Дональд Трамп шинээр “Хиймэл Оюуны Зэвсэгт Хүчин” (AI Force) байгуулах болон түүний тэргүүн буюу хиймэл оюуны асуудал эрхэлсэн шинэ зөвлөхийг томилохоор төлөвлөж байгаагаа зарласан ч энэхүү санаачилгынхаа талаар болон хэрхэн хэрэгжүүлэх арга замын талаар дэлгэрүүлээгүй байна. Вашингтоны хууль тогтоогчдын дунд сүүлийн үед хиймэл оюуны технологийн болзошгүй аюул эрсдэлийн талаар болгоомжлол нэмэгдсээр байгаа. Энэ сарын эхээр Anthropic компанийн мэргэжилтэн асан Жэйкоб Коксон “хиймэл оюуныг хөгжүүлж буй хүмүүс энэ технологи нь арван жилийн дараа гэхэд биднийг бүгдийг устгаж болзошгүй гэдэгт чин сэтгэлээсээ итгэдэг” хэмээн мэдэгдэж байв. Харин Трампын хувьд хиймэл оюуны технологитой холбоотой болгоомжлолыг удаа дараа няцааж, нэмэлт зохицуулалт шаардлагагүй гэж үзсэн хэвээр байна. “Бид энэхүү гайхалтай салбарын өсөлт хөгжлийг ямар нэг байдлаар сааруулах, эсвэл боомилохгүй. Харин ч бид үүнийг өсөж хөгжихөд нь дэмжиж, тусалж, анхаарал тавих болно. Гэхдээ бид сөрөг үр дагавар, хууль бус үйлдлийг хянах болно. Үүнийг бид одоо байгаа эрүүгийн болон иргэний эрх зүйн тогтолцоогоо ашиглан маш хялбархан шийдэх боломжтой” гэж Трамп мэдэгджээ. Хэрвээ тэр энэхүү санаачилгаа хэрэгжүүлбэл хоёр дахь удаагаа хиймэл оюуны асуудал хариуцсан зөвлөх томилох юм. Энэ албан тушаалыг өмнө нь венчур хөрөнгө оруулагч Дэвид Сакс хашиж байгаад өнгөрсөн хавар өөр ажилд томилогдож байв. Сакс нь Трампын маргаантай байр суурийг дэмждэг байсан юм. Цагаан ордон одоогоор Трампын мэдэгдэлтэй холбоотой тайлбар хийгээгүй байна. Трампын энэ мэдэгдэл Пүрэв гарагт Хятадын төрийн тэргүүн Ши Жиньпинтэй уулзахын өмнө гарчээ. Хоёр улс хиймэл оюуны технологийн салбарт тэргүүлэхийн төлөө ширүүн өрсөлдөж, эдийн засаг, батлан хамгаалах салбарынхаа гол тулгуур болгохыг зорьж байгаа. Хэрвээ энэ салбарт төрөөс хатуу хяналт, зохицуулалт нэвтрүүлбэл Америкийн компаниудын Хятадын компаниудтай өрсөлдөх боломж хязгаарлагдана гэж Трампын засаг захиргаа болон зарим технологийн салбарын манлайлагчид үздэг. Ши Жиньпиний айлчлалыг угтуулан Ням гарагт АНУ-ын сангийн сайд Скот Бессент, Хятадын засгийн газрын ерөнхий сайдын орлогч Хэ Лифэнь нар Нью-Йорк хотын JPMorgan Chase банкны төв байранд хиймэл оюуны аюулгүй байдал, худалдаа, эдийн засгийн асуудлуудыг хэлэлцэх гэж байгааг албаны эх сурвалж мэдээлжээ. Эх сурвалж: Reuters

ДЭЛХИЙГЭЭР АЯЛАХ ШИЛДЭГ 100 АЖИЛТНЫ III ЭЭЛЖ ЯПОН УЛСЫГ ЗОРИЛОО Үндэсний брэнд бүтээгч Грийн Группийн 2026 оны III ээлжийн бизнес аялалд гүйцэтгэлээрээ шалгарсан 30 ажилтан дэлхийд хөгжлөөрөө тэргүүлэгч Япон улсыг зорилоо. Инноваци, технологийн дэвшил, бүтээмжээр манлайлан, бодит амжилт бүтээсэн ШИЛДЭГ-100 ажилтнаа жил бүр аялуулж, Хүний нөөцийн бодлогын хүрээнд олон улсын туршлагаас суралцах боломж олгож, дараагийн түвшний манлайлагчдыг бэлтгэж байна. Энэхүү аялал нь ажилтнуудын манлайллыг дэмжих, байгууллагын тогтвортой өсөлтийг хангах, бизнесийн цар хүрээг тэлэх зэрэг олон талын ач холбогдол бүхий бодит хөрөнгө оруулалт юм.